Մարալը շոկային վիճակում է, դեռ չի հասկանում, թե ինչ է կատարվում իր շուրջը, ի վերջո 4 ամիս եղել է գերության մեջ: Այս մասին ԼՈՒՐԵՐ.com-ի հետ զրույցում ասել է գերությունից վերադարձած Մարալ Նաջարյանի հարևանուհին՝ Անահիտ Թարխանյանը, հավելելով, որ գիշերը ծանր է եղել բոլորի համար:
Վերջինս նշեց, որ Մարալի արտաքին տեսքի փոփոխությունն ակնհայտ է. «Ահա նրա գերությունից առաջ և հետո արված լուսանկարը: Տարբերությունը ակնհայտ է, սակայն նա շարունակում է գեղեցիկ մնալ թե՛ արտաքնապես և թե՛ ներքուստ»:
Հարևանուհին պատմել է, որ երբ Մարալի ընտանիքը նոր էր տեղափոխվել Բեյրութ, Մարալը իր փոքրիկ այգին վերածեց բիզնեսի համար նախատեսված տարածքի. «Նա այդ տարածքը օգտագործեց որպես գեղեցկության սրահ, որը շատ կարճ ժամանակում դարձավ շրջանի ամենահայտնի սրահներից մեկը: Քանի որ Լիբանանում շարունակվում էր ֆինանսական ճգնաժամը, հաճախորդների համար դժվար էր վճարել, և Մարալը հաճախ անվճար էր սպասարկում իր հաճախորդներին: Նա եկել էր ընդմիշտ Հայաստանում ապրելու համար, իսկ հետո պլաններ ուներ Հայաստան բերելու նաև իր չափահաս երեխաներին»:
Հիշեցնենք, որ Ադրբեջանում չորս ամիս գերությունից հետո լիբանանահայ Մարալ Նաջարյանը չորեքշաբթի ազատ է արձակվել: