Երեկ Մամուլի ազատության միջազգային օրն էր։ Շատերը մեզ՝ լրագրողներիս շնորհավորեցին այդ կապակցությամբ, թեպետ՝ ոմանք ուղղակի բարոյական իրավունք չունեին խոսելու ազատ մամուլից, բայց շնորհավորեցին։ Իսկ, ահա, ՀՀ վարչապետ, նախկին ու գուցե նաև ներկա լրագրող և խմբագիր Նիկոլ Փաշինյանն այդպես էլ որևէ շնորհավորական խոսք չասաց լրագրողների տոնի առթիվ։ Երեկ ամբողջ օրը՝ մինչ այս պահը ներառյալ, շնորհավորանքի նշույլ անգամ չնկատեցինք Նիկոլ Փաշինյանի ո՛չ ֆեյսբուքյան էջում, ո՛չ վարչապետի պաշտոնական հաղորդագրություններում, ոչ էլ նրա լայվերում։ Թերևս բարին էլ դա էր: Ի վերջո, ինչպե՞ս կարելի է ընդունել մի լրագրողի-վարչապետի շնորհավորանք, որն ընդամենը մի քանի օր առաջ լրատվադաշտի 99 տոկոսին համարում էր ծախու և ոչ անաչառ։ Կարելի է ենթադրել, որ պարզապես Նիկոլ Փաշինյանի երեսը չի բռնել շնորհավորել «99 տոկոս» ծախված իր գործընկերներին։
Հ․Գ․ Ավելի ուշ տեղեկացանք, որ Թվիթերի իր էջում Փաշինյանը շնորհավորական երկու տող է գրել «ազատ մամուլի» մասին․ «Ազատ մամուլը ժողովրդավարության անկյունաքարն է։ Շնորհավորում եմ բոլոր այն լրագրողներին, որոնք առանց ջանք խնայելու, խիզախորեն ձգտում են ճշմարտության և հանրությանը տրամադրում են հավաստի և ճշտված ինֆորմացիա»։