Իհարկե քաղաքում բավական լավ տրամադրություն է, բայց այն, ինչ ես առավոտյան ուղիղ եթերում ասել էի, հիմա հաստատվեցին: Այս մասին այսօր՝ մայիսի 13-ին, Երեւանի փողոցներում շրջելիս ուղիղ եթերում նշեց ՀՀ վարչապետ Նիկոլ Փաշինյանը՝ հավելելով, որ հակահամաճարակային կանոնները պահելու հետ կապված խնդիր ունեն:
«Մարդկանց շրջանում տարածված է, որ կորոնավիրուսի հետ կապված այս ամենը սարքած է, անիմաստ աղմուկ է եւ այլն: Նման հայտարարություններով ֆոն է ստեղծվում, որ մարդիկ զգոնությունը կորցնեն: Քաղաքացիների մի մասը պահանջում է, որ սահմանափակումները խստացվեն, օրինակ առանց դիմակի դուրս գալու համար տուգանքներ սահմանվեն, մյուս մասը պահանջում է, որ տրանսպորտը անհապաղ բացվի, ոչ մի սահմանափակում չլինի»,-ասաց Փաշինյանը:
նա ընդգծեց, որ իհարկե, այս հարցում բանաձեւեր չկան. «Եթե նայենք աշխարհի մյուս երկրներում ինչ է կատարվում, բոլոր երկրներում էլ շփոթություն կա որոշակի, թե որ միջոցառումն է, որ պետք է մինչեւ վերջ եւ անմնացորդ շարունակել եւ դա բավականին բարդ թեմա է, որովհետեւ այն ունի տնտեսական բաղադրիչ, սոցիալական բաղադրիչ, քաղաքական բաղադրիչ եւ դա պրոբլեմատիկ է: Մեզ համար ակնհայտ է, որ այս փուլում չենք կարող արտակարգ դրությունը վերացնենք, բայց սահմանափակումների ռեժիմի նկատմամբ մեր վերաբերմունքը պետք է որոշակիորեն փոխվի»,- նշեց նա:
Վարչապետը նշեց, որ ռազմավարություն պետք է լինի, որ ոչ թե մարդիկ իրենց տներում փակվեն, այլ իրենց առօրյա կյանքում պահեն հակահամաճարակային կանոնները. «Մենք պետք է փորձենք վարչական լծակներ կիրառել, որ մարդիկ հակահամաճարակային կանոնները պահեն, որ տնտեսությունն ու մարդիկ աշխատեն. առանցքային գործոնը շարունակում է մնալ մեզնից յուրաքանչյուրի անհատական պատասխանատվությունը»,- շեշտեց վարչապետը::