Վարչապետ Նիկոլ Փաշինյանի ուղերձից առաջ հեռարձակման ոչ ենթակա կադրերը հրապարակվելուց հետո, ինչպես հայտնի է, սեփական դիմումների հիման վրա աշխատանքից ազատվեցին Հանրային հեռուստաընկերության գործադիր տնօրեն Մարգարիտա Գրիգորյանը, որն այդ պաշտոնը զբաղեցնում էր անժամկետ, և լրատվական ծառայության ղեկավար Պետրոս Ղազարյանը, որը շարունակելու է Հանրայինում աշխատել որպես լրագրող- հաղորդավար։
Մարգարիտա Գրիգորյանի փոխարեն գործադիր տնօրենի ժամանակավոր պաշտոնակատար է նշանակվել Հանրային հեռուստաընկերության ստեղծագործական հարցերով տնօրենի տեղակալ Արմեն Սարգսյանը, Պետրոս Ղազարյանի փոխարեն՝ նրա տեղակալ Ռուբեն Շահինյանը։
Մենք կապվեցինք Հանրային հեռուստառադիոընկերության խորհրդի նախագահ Արա Շիրինյանի հետ՝ հասկանալու համար, թե երբ են պատրաստվում մրցույթ հայտարարել, ինչ ժամկետներում դա կլինի, քանի որ մրցույթի կարգը «Հանրային հեռուստատեսության և ռադիոյի մասին» ՀՀ օրենքով սահմանում է հենց խորհուրդը, սակայն Շիրինյանը հղում կատարեց օրենքին՝ ասելով, որ դա իմանալու համար պետք է օրենքը կարդալ։ Մինչդեռ օրենքում մրցույթի ժամկետները նշված չեն, եւ այլ հարցեր էլ մենք ունեինք։ Շիրինյանին հարցրինք՝ արդեն կա՞ն գործադիր տնօրենի թեկնածուներ, սակայն նա այդ հարցին էլ չպատասխանեց։ «Ես չեմ ցանկանում այդ հարցը մեկնաբանել, քանի որ Դուք պատրաստ չեք այդ հարցը ճիշտ ձևակերպելու»,- վերամբարձ տոնով հայտարարեց Շիրինյանը՝ չթաքցնելով իր նեգատիվ վերաբերմունքը մեր հանդեպ ,և անջատեց հեռախոսը։
Նա նախկինում էլ չէր մեկնաբանել վարչապետի կադրերը «սլիվ» անելու միջադեպը։ Եվ, առհասարակ, նա իր նշանակման օրվանից թաքնվել է Մարգարիտա Գրիգորյանի թիկունքում, մինչդեռ Հանրային հեռուստաընկերության եւ ռադիոյի իրական ղեկավարն ինքն է եւ ինքն էլ առաջին հերթին պետք է պատասխան տար տեղի ունեցած միջադեպի համար, սակայն Շիրինյանը ջրից չոր դուրս եկավ, Մարգարիտա Գրիգորյանն ու Պետրոս Ղազարյանը՝ պատժվեցին։ Նշենք նաև, որ Շիրինյանի պաշտոնը բավականին պաշտպանված է՝ եթե խորհրդի անդամները դիմում չեն գրում կամ այլ պաշտոնի չեն նշանակվում, կարող են պաշտոնից հեռացվել միայն այն դեպքում, եթե առանց հարգելի պատճառի 3 ամսից ավելի չեն մասնակցել խորհրդի աշխատանքներին, դատապարտվել են դատարանի դատավճռով, կորցրել են ՀՀ քաղաքացիությունը, դատարանի դատավճռով ճանաչվել են անգործունակ կամ էլ մահացել են: Նշված դեպքերում խորհրդի անդամի լիազորությունները վաղաժամկետ դադարեցվում են ՀՀ նախագահի հրամանագրով։
Մենք կապվեցինք Հեռուստառադիոխորհրդի անդամ Մերուժան Տեր- Գուլանյանի հետ եւ մի քանի հարց տվեցինք նրան։ Նա ասաց, որ Հանրայինի գործադիր տնօրենի պաշտոնում անձը ժամանակավոր պաշտոնակատար կարող է աշխատել առավելագույնը 6 ամիս, որից հետո Հանրայինը պետք է նոր գործադիր տնօրեն ունենա։ Մրցույթին կարող է մասնակցել ցանկացած մարդ։ Ինչ վերաբերում է լրատվական ծառայության ղեկավարին, ապա նրան նշանակում է գործադիր տնօրենը։ Տեր-Գուլանյանին հարցրինք, թե հայտնի իրադարձություններից հետո խորհուրդը նիստ անցկացրե՞լ է։ Նա ասաց, որ 2 օր առաջ են նիստ արել, որին ինքը մասնակցել է հեռավար կարգով։ «Մարգարիտա Գրիգորյանը ներկայացրել էր հրաժարականի դիմում, անկեղծ ասած՝ իմ մեջ ցանկություն կար կողմ չքվեարկել, սակայն խորհուրդն ունի 5 անդամ, կլիներ 4 կողմ, 1 դեմ՝ ինքը, միևնույն է, ազատված կլիներ։ Ես չեմ կարծում, որ այն, ինչ տեղի էր ունեցել, կարող էր պատճառ դառնալ, որպեսզի նա հրաժարական տա, ես այդ կադրերը չեմ նայել եւ չեմ կարծում, որ սարսափելի բան կար։
Ես ուզում էի դեմ քվեարկել, բայց քանի որ ինքն արժանապատվորեն որոշել էր․․․ դա իր որոշումն էր, մտածեցի՝ մարդու որոշումն է, իմաստ չունի դեմ քվեարկել։ Ես կարծում եմ՝ Արա Շիրինյանը չպետք է ընդուներ իր դիմումը, դա պետք է չդներ խորհրդի քննարկմանը, պետք է խորհրդի ներկայությամբ առաջարկեր դիմումը հետ վերցնել, պետք է սկզբունքորեն մերժեր դիմումը, բայց եթե մարդը որոշել է, որ պիտի գնա, կգնա։ Ես ափսոսում եմ, որ ներկա չէի, սակայն կա մի այլ բան՝ կա՛մ չես ընդունում տնօրենի դիմումը, կա՛մ ինքդ էլ ես դիմում գրում։ Մարգարիտա Գրիգորյանը շատ լավ աշխատեց այս տարիների ընթացքում, հեռուստաընկերության շենքը կարգի բերեց, մյուս տեսակի գործունեությունն էլի շատ լավն էր, այդ կիսափլվող շենքն ինքը շատ լավ, աշխատանքային տեսքի բերեց, և պետք է որ իրենից շնորհակալ լինեին բոլորը։ Ես անձնապես Մարգարիտայի հետ շատ բաներում համաձայն չէի՝ և՛ ստեղծագործական ծրագրերի հետ կապված, բայց ինքն իսկապես շատ գործ արեց, ինչի համար ես իրեն շնորհակալություն եմ հայտնում»,- ասաց Մերուժան Տեր- Գուլանյանը։
ՀԳ․Հանրայինի «Լուրերի» աշխատակազմից մեզ ասացին, որ Պետրոս Ղազարյանի ազատման հրամանը ընդամենը ձևական է եղել՝ ուղղված հանրությանը։ Իրականում նա շարունակում է կատարել «Լուրերի» խմբագրի պարտականությունները, ամեն օր ժողով է անում «Լուրերի» լրագրողների հետ, հանձնարարություններ է տալիս,ողջ գործընթացը ինքն է ղեկավարում, իսկ Ռուբեն Շահինյանը ընդամենը դիտորդ է։