Կուրթանցի Մեխակը շուտով նոր տուն կունենա։ Այս մասին NEWS.am-ին հայտնեց Մեխակը։
«Երեւի ուզում են ինձ տուն տալ։ Կանչեցին Երեւան, ես ու վարչական ղեկավարը գնացինք, կադաստրով շուռ տվին իմ վրա տունը, ով առել է այդ տունը նա էլ կգա բացումը կանի, նոր կմոտենանք տանը։ Հիմա դեռ հստակ ոչինչ չեմ կարող ասել։ Արդեն գուշակում եմ, որ իմ տունն է լինելու»,- պատմեց նա։
Մեխակը հայտնեց, որ տունը գտնվում է Կուրթան համայնքում. «Հեռվից տեսել եմ, ասում են՝ մինչեւ օգնողները չգան, բացումը չանեն, ոչ մի դեպքում տանը մոտենալ չի կարելի»։
Նա ասաց, որ շատ երջանիկ է իրեն զգում. «Չնայած, որ մինչեւ բանալիները ձեռքումս չլինեն, չեմ ուզում ոչինչ ասել»։
Հիշեցնենք, որ NEWS.am-ն ավելի վաղ անդրադարձել էր կուրթանցի երիտասարդի խնդրին: ՎարչապետՆիկոլ Փաշինյանը «Այո»-ի քարոզարշավի ընթացքում տան հարցով իրեն մոտեցած Մեխակին հանդիմանել էր, որ գնա եւ տուն ստեղծի ինքնուրույն, ասելով` առողջ տղա ես, աշխատի: Դեպքից հետո NEWS.am-ի նկարահանող խումբը այցելել էր Մեխակին եւ պարզել, որ նա ոչ միայն տան խնդիր ունի, այլեւ մի քանի առողջական` այդ թվում ողնաշարի գրիժա, ինչի պատճառն այն է, որ 15 տարեկանից ֆիզիկական ծանր աշխատանք է կատարել` ընտանիքին օգբելու համար: Մեխակի առողջական վիճակը վերջին շրջանում սրվել է եւ նա ի վիճակի չի աշխատել: Մեխակն իր եղբոր ընտանիքի հետ ապրում է վագոն տնակում, որտեղի խոնավության պատճառով տան անդամները պարբերաբար հիվանդանում են:
NEWS.am-ի անդրադարձը մեծ արձագանք գտավ հասարակության շրջանում: Շատ քաղաքացիներին Մեխակի ընտանիքին օգնելու ցանկություն հայտնեցին: Հրապարակումից հետո վարչապետը հրապարակային ներողություն խնդրեց Մեխակից: